प्रधानमन्त्री बाबुराम भट्टरार्ईसहित एकीकृत माओवादी र नेपाली काँग्रेसका नेताहरुले शान्ति प्रक्रियाबारे आफूहरु सहमति नजिक पुगेको र छिट्टै महत्वपूर्ण उपलब्धी हुने दाबी गरेपछि एमालेका नेताहरु सशंकित भए । एमाले नेताहरुमा आफूहरुलाई पन्छाएर वार्ता गर्दा माओवादी नेताहरुले काँग्रेसका नेतालाई फस्लाङफुस्लुङ पार्न सक्छन भन्ने आशंका त थियो नै शान्ति प्रक्रियामा आफ्नो भूमिका गौण भएको देखिन सक्ने भय पनि थियो । परिणामस्वरुप एमाले नेताहरुले सार्वजनिक रुपमा नै चेतावनी दिए, –‘एमालेलाई पन्छाएर माओवादी र काँग्रेसबीच सहमति भए परिणाम भंयकर हुनेछ ।’

शान्ति प्रक्रिया र संविधान निर्माणक्रममा सैद्धाान्तिक र नीतिगत पक्षमा सबैभन्दा बढी अन्तरविरोध माओवादी र काँग्रेसबीच नै छ । शान्ति प्रक्रियामा माओवादी, काँग्रेस र एमालेबीच वार्ता भइरहने तर सहमति नभएपछि दुई पक्षिय तथा त्रिपक्षिय वार्ता गर्दै समाधान खोज्ने सहमति भयो । यसैक्रममा कार्तिक ९ गते नयाँबजारस्थित माओवादी अध्यक्ष पुष्पकमल दाहालको निवासमा माओवादी र काँग्रेसका नेताबीच वार्ता भयो ।

माओवादीप्रति आक्रामक रुपमा प्रस्तुत हुँदै आएका काँग्रेसका नेताहरुले वातावरण सकारात्मक बन्दै गएको र माओवादी इमान्दार भए मंसिर १४ गते भित्र नै शान्ति प्रक्रिया पूरा हुन सक्ने बताउन थाले । धेरै कुरा मिलिसकेको बताउदै कांग्रेस नेताहरुले समायोजन हुने जनसेनाका लडाकुहरुको संख्या र पुर्नस्थापना प्याकेजबारे मात्रै टुङ्गो लाग्न बाँकी रहेको धारणा व्यक्त गर्न थाले । यता, प्रधानमन्त्री भट्टराईदेखि माओवादीका नेताहरुले पनि काँग्रेस धेरै सकारात्मक भएको भन्दै शान्ति प्रक्रियामा महत्वपूर्ण उपलब्धी हुने उद्घोष गरे ।

काँग्रेससँग माओवादी नेताहरुको औपचारिक र अनौपचारिक छलफलबाट सकारात्मक कुरा आउन थालेपछि एमालेका वरिष्ठ नेता माधवकुमार नेपालले माओवादीको आश्वासनमा नफस्न काँग्रेस नेतालाई सार्वजनिक रुपमै सुझाव दिए । उनले भने–‘अरुलाई फकाउन र फसाउन माओवादी सिपालु छन भन्ने जानकारी आफूहरुलाई भएकाले नै वार्तामा पन्छाउन खोजिएको हो । मााओवादी र कांग्रेसबीच हुने वार्ताले मात्रै शान्ति प्रक्रिया र संविधान निर्माणमा सहमति जुटन सक्दैन ।’

त्यसपछि प्रधानमन्त्री भट्टरार्ईले कार्तिक ११ गते वरिष्ठ नेता नेपालसँग भेट गरी शान्ति र संविधानबारे छलफल गरे । नेपालको कोटेश्वरस्थित निवासमा भएको वार्तामा शान्ति प्रक्रिया र संविधान निर्माणका लागि दलहरुबीच छलफल गर्दै अघि बढ्ने सहमति भयो । र, तीन दलबीच संयुक्त रुपमा छलफल अघि बढाउने सहमति पनि भएको छ ।

मुख्य गतिविधि